بو دراماتیک اثر، کؤچ مسئله‌سی و کؤچن قادینلارین یاشادیقلاری چتینلیکلره اینسانی بیر باخیش‌لا باخاراق، گۆنوموزون آجی ‏آنجاق ملموس واقعیتلری‌نین بیر پارچاسینی صمیمی و ملموس بیر دیل ایله موخاطبه سؤیله‌مگه چالیشیر. بو ایجرانین گؤزه گلیم ‏اؤزللیکلریندن بیریسی، تبریزلی تاماشاچیلارلا داها درین بیر ایرتیباط قورماق و آنلاملاری داها یاخجی یئتیرمک اۆچون آنا دیلیمیز ‏آذربایجان تۆرکجه‌سیندن فایدالانماقدیر؛ بیله¬رک توتولموش بو تصمیم، تاماشاچیلارین تۆرکجه تئاترلاردان اوْلان طنطنه‌لی ایستیقبالینی ‏دا گؤز اؤنونه آلاراق، ایجتیماعی و فرهنگی بیر دانیشیغین تملینی قورماغا فایدالی اوْلا بیلر.‏

بو اثر، علی‌اکبر عطاردی‌نین یؤنتمن اوْلاراق ایلک تجروبه‌سی ساییلیر. بو هۆنرمند ایلک آددیم اوْلاراق، آغیر عاطیفی یۆک داشییان ‏ایجتیماعی بیر اثر سئچه‌رک، هم ده آیدین سرداری‌نیادان آنا دیلیمیزه چئویرمه‌سینی ایسته‌یه‌رک، اثرین دغدغه‌لرینی موخاطبین ‏دیلینه یاخینلاتماغا چالیشمیشدیر.‏

تئاتر اؤیرتمنی هم ده تجروبه‌لی و تانینمیش اوْیونچو اوْلان مهرداد نیکجو باشدا گلمک اۆزره، نسرین فاتح، سئودا عبدالعظیم‌زاده، ‏نازلی سلیمیان و صدف رحیمی بو تاماشانین اوْیونچولار اکیپینی اوْلوشدورماقدادیرلار. بو اوْیونچولار اکیپینده تجروبه هم ده ‏گنجلیگین بیر آرایا گلمه‌سی، صحنه‌ده تأثیرلی و قالارغی لحظه‌لر یارالدا بیله‌جکدیر.‏

‏«اوشاق» تاماشاسی، پارلاق بیر اوْیون متنینه دایاناراق، سسلری آزراق ائشیدیلمیش اوْلان قادینلارین سسی اوْلماغا چالیشیر. بو ‏تئاترین تاماشاسی، ایجتیماعی تئاتر سئونلر اۆچون اونودولماز بیر تجروبه اوْلاجاقدیر.‏