ایراندا ایلک دفعه:
تبریز بیلیم یوردوندا تۆرک دیلی و ادبیاتی علمی درنَگینین غرفهسی آچیلدی
بو غرفهده، اساساً بو ساحهنین اؤیرنجیلری و اوستادلاری طرفیندن یازیلیب نشر اوْلونموش زنگین تاریخی، ادبی، شعر و حکایه کیتابلاری نۆماییش اوْلوندو. عینی زاماندا، آنا دیلینین روانشناسلیق، تربییهوی علملر و بئیین-علمی باخیمیندان اهمیتینی آچیقلایان علمی بروشورلار زیارتچیلره تقدیم ائدیلدی.
غرفهنین دقّتچکن جهتلریندن بیری ده قدیم آذربایجان بؤلگهسینین کیشی و قادینلارینا مخصوص اسکی گئییم نۆمونهلرینین سرگیلنمهسی ایدی کی، بو دا بؤلگهنین مدنی و تاریخی کیملیگینی گؤزل شکیلده عکس ائتدیریردی. بۇندان علاوه، مۆختلیف مۆسابیقهلر تشکیل اوْلوندو و قالیبلره تۆرکجه شعر و دستور کیتابلاری هدیّه ائدیلدی کی، بو دا غرفهیه خۆصوصی بیر جانلیلیق قاتدی.
سجّاد صبوری، تۆرک دیلی و ادبیاتی علمی درنگینین دبیری بو بارهده دئدی:
«بو، علمی درنهییمیزین حرکت فئستیوالیندا ایلک ایشتیراکیدیر و بو دا اؤیرنجی یوْلداشلاریمیزین گئجه-گۆندوز امَیی ایله باش وئریب. دئیه بیلریک کی، بو ایشین هله باشلانغیجیدیر و قاباقدا اۇزون بیر یوْل وار. ایلک دفعه بئله بیر فئستیوالدا ایشتیراک ائتمهییمیزه باخمایاراق، غرفهمیز چوخ بؤیوک و گؤزلهنیلمز بیر ماراقلا قارشیلاندی؛ بو دا اؤیرنجیلرین آذربایجان مدنیتینه و تۆرک دیلینه اوْلان سئوگیسینین آچیق گؤستریجیسیدیر.»
اوْ، سؤزلرینه بئله داوام ائتدی:
«غرفهمیزین تشکیلینه دستک وئرن بۆتون طلبه دوْستلارا و دگرلی تشکیلاتچیلارا تشککور ائدیرم. اۆمید ائدیرم کی، بو بؤلومه گلهجکده قبول اوْلوناجاق اؤیرنجیلر ده بو علمی درنگی فعّال ساخلاسینلار و بو یئنی باشلانان یوْلو یاریمچیق بۇراخماسینلار.»
تۆرک دیلی و ادبیاتی غرفهسی، تبریز بیلیمیوردونون مرکزی بیناسیندا 4 گۆن بوْیونجا آچیق ایدی و بو غرفه فئستیوالین ان چوخ ماراق گؤرن غرفهلریندن بیرینه چئوریلمیشدی.